Klubi i Prishtinës ka njoftuar se kanë dalë negativë në ritestim tetë futbollistët e saj që kishin rezultuar pozitivë në testimin e bërë në Gjibraltar, duke bërë që ndeshja parakualifikuese për Ligën e Evropës kundër Lincoln Red Imps të anulohej të shtunën.
Bardhekaltrit u rikthyen në Prishtinë të shtunën pak para mesnatës, pasi ngjashëm si në fillim të javës, edhe të shtunën ndeshja me Lincoln në Gjibraltar u anulua sepse tetë futbollistë të tyre dolën pozitiv në testet për Covid-19, raporton Gazeta Express.
Fituesja e Kupës së Kosovës e krijoi një ekip të ri me lojtarë të huazuar nga klubet rivale të Superligës, por edhe ai i dështoi në testet për Covid-19 në Gjibraltar.
Prishtina ka ngritur dyshime në saktësinë e testeve në Gjibraltar, për shkak se njëri prej futbollistëve të saj të shëruar nga Covid-19, i cili ishte konfirmuar negativ në Kosovë, doli pozitiv në testin e bërë në Gjibraltar.
Në një njoftim në rrjetet sociale të hënën, bardhekaltrit njoftuan se lojtarët e testuar pozitivë në Gjibraltar kanë dalë negativ dy ditë më vonë në Prishtinë.
“Tetë futbollistët e ritestuar dalin negativ. Dje skuadra ka ritestuar tetë futbollistët e dal pozitiv në Gjibraltar dhe sërish pas marrjes së mostrave nga IKSHPK, futbollistët kanë rezultuar negativ”, thuhet në njoftimin e Prishtinës.
Prishtina i është drejtuar Komisionin e Etikës dhe Disiplinës të UEFA-s me argumentet e veta në lidhje me ndeshjen kundër Lincoln Red Imps – e cila u anulua dy herë brenda javës, për shkak të rasteve të shumta me koronavirus në ekipin kosovar.
Bardhekaltrit janë të bindur në një vendim të favorshëm nga shtëpia e futbollit evropian.
Postimi i plotë në llogarin e Facebook:
Tetë futbollistët e ritestuar dalin negativ
Dje skuadra ka ritestuar tetë futbollistët e dal pozitiv në Gjibraltar dhe sërish pas marrjes së mostrave nga IKSHPK, futbollistët kanë rezultuar negativ!
FC Prishtina ka dorëzuar tërë materialin e saj të provave me ndihmën edhe të avokatëve sportiv evropian.
Klubi është në pritje nga vendimi që do të marr Komisioni i Etikës dhe Disiplinës pranë UEFA-s.
Duhet theksuar se nuk është vetëm rasti i Prishtinës që po shqyrtohet, në situatë identike ndodhet edhe skuadra më e madhe sllovake, Slovan Bratislava pas dy herë anulimit të ndeshjes në Ishujt Faroe.
FC Prishtina vazhdon të besojë se çdo vendim i UEFA-s do të jetë i drejtë.
Notice: Trying to access array offset on value of type null in /home/customer/www/a-news24.com/public_html/wp-content/themes/goodnews5/framework/functions/posts_share.php on line 66
